ភ្នំពេញៈ ពេលអ្នកដើរចូលទៅក្នុងធនាគារមួយ អ្នកឃើញកៅអីជាច្រើនជួរសម្រាប់អង្គុយរង់ចាំ។អ្នកតម្រូវឲ្យ ចាប់លេខរង់ចាំ ដែលធ្វើឲ្យអ្នកត្រូវរង់ចាំរយៈពេលយូរ អ្នកប្រហែលជាទទួលអារម្មណ៍ថា មិនត្រូវបានគេឲ្យតម្លៃខ្លាំងទេ។ ពេលអ្នកកុម្ម៉ង់ម្ហូប ហើយគេយកម្ហូបខុសមកឲ្យអ្នក អ្នកនឹងប្រហែលជាមិនត្រឡប់មក ភោជនីយដ្ឋាននេះវិញទៀតទេ។
ការសិក្សាវាស់ស្ទង់មួយដែលធ្វើឡើងដោយការិយាល័យកិច្ចការ អតិថិជន បង្ហាញថា អតិថិជនដែលមានអារម្មណ៍មិនរីករាយ នឹងនិយាយអំពីអារម្មណ៍នេះ ទៅមនុស្សយ៉ាងហោចណាស់ចំនួន៩នាក់ ហើយ១៣ភាគរយនៃមនុស្ស៩នាក់នោះ នឹងនិយាយតៗគ្នាទៅមនុស្សចំនួន២០នាក់ ឬច្រើនជាងនេះទៀត។ រីឯអតិថិជនដែលមានអារម្មណ៍រីករាយវិញ នឹងនិយាយពីអារម្មណ៍របស់ខ្លួនទៅមនុស្សជាមធ្យមប្រហែល៥ នាក់។ អតិថិជនរីករាយម្នាក់ទំនងជានាំនូវអតិថិជនថ្មីៗច្រើនទៀត ហើយថែមទាំងនិយាយសរសើរលើសពីសេវាផលិតផលនោះទៀត រីឯអតិថិជនមិនរីករាយនឹងទាញអាជីវកម្មក្រុមហ៊ុនឲ្យធ្លាក់ចុះ។
បុគ្គលិកជាបេះដូង និងដួងព្រលឹងនៃឧត្តមភាពសេវាផ្តល់ទៅអតិថិជន ហើយស្ទើរគ្រប់អាជីវកម្ម វាជាទ្រព្យសម្បត្តិសំខាន់បំផុត។ អន្តរសកម្មភាពរបស់អតិថិជនចាប់ផ្តើមជាមួយនឹងការទំនាក់ទំនង។ ហេតុដូច្នេះ បុគ្គលិកស្ថិតនៅជួរមុខ ហើយរាល់សកម្មភាពរបស់បុគ្គលិកអាចជំរុញដល់ភាពប្រសើរនៃ ទំនាក់ទំនងជាមួយអតិថិជនឬធ្វើឲ្យទំនាក់ទំនងសឹករេចរឹល។ ហេតុដូច្នេះ នៅក្នុងអាជីវកម្មមួយ វាល្អឬអាក្រក់អាស្រ័យទៅលើបុគ្គលិក។
ការបណ្តុះបណ្តាលបុគ្គលិកចាំបាច់ត្រូវល្អលើសអ្វីដែលសម្រាប់ តែបំពេញការងារ និងចំណេះដឹងស្តីពីផលិតផល និងសេវា។ វាគួរតែរួមបញ្ចូលការបង្កើតនិងបណ្តុះទំនាក់ទំនងជាមួយអតិថិជន ការប្រព្រឹត្តដោយមានការគោរព និងសេចក្តីថ្លៃថ្នូរជាមួយអតិថិជន ការផ្តល់ឲ្យអតិថិជននូវការយកចិត្តទុកដាក់ ការប្រាស្រ័យទាក់ទង និងការធានាការប្តេជ្ញាចិត្តពេញលេញពីបុគ្គលិកលើតម្លៃ ទស្សនវិជ្ជា និងវប្បធម៌ ហើយដែលអ្វីទាំងអស់នេះក្រុមហ៊ុនត្រូវប្រតិបត្តិ។
ក្រុមហ៊ុនដែលផ្តល់ការចូលរួម និងស្តាប់មតិយោបល់ពីបុគ្គលិក និងផ្តល់អំណាចដល់បុគ្គលិក ជាទូទៅសម្រេចបាននូវអត្រាបំពេញចិត្តអតិថិជនខ្ពស់ខ្លាំង ជាងក្រុមហ៊ុនដែលមិនធ្វើដូចនេះ។ បុគ្គលិកចង់ក្លាយជារបស់ និងផ្នែកនៃអាជីវកម្មរបស់ក្រុមហ៊ុន។ ការបណ្តុះអារម្មណ៍ថាអាជីវកម្មរបស់ក្រុមហ៊ុនគឺជាផ្នែក របស់បុគ្គលិកក៏ត្រូវការរយៈពេលយូរផងដែរ។ ពេលបុគ្គលិកយល់អ្វីទាំងអស់នេះ ពួកគេនឹងយល់ថា បើអាជីវកម្មរបស់ក្រុមហ៊ុនបរាជ័យ ពួកគេក៏បាត់បង់ការងារខ្លួនផងដែរ។
ឃ្លាថា «អតិថិជនជាអ្នកទី១» «អតិថិជនជាស្តេច» «អតិថិជនមិនដែលខុសនោះទេ» គឺត្រូវបាននិយាយជាទូទៅ ហើយការនិយាយបែបនេះគឺដោយសារតែក្រុមហ៊ុនចង់ឲ្យអតិថិជន ក្លាយជាអតិថិជនស្មោះត្រង់។
អតិថិជនជាពិសេសអតិថិជនដែលស្មោះត្រង់ ចង់ឲ្យក្រុមហ៊ុនស្តាប់ពីការចង់បានរបស់ខ្លួន។ អតិថិជនចង់ឲ្យក្រុមហ៊ុនដឹងពីតម្រូវការរបស់ខ្លួន និងស្តាប់មតិយោបល់របស់ខ្លួន។ ការធ្វើការសិក្សាវាស់ស្ទង់គឺជាមធ្យោបាយល្អបំផុតសម្រាប់ ការវាស់ស្ទង់អត្រាបំពេញចិត្តអតិថិជន សម្រាប់ការកំណត់គុណវិបត្តិសក្តានុពលក្នុងការផ្តល់ជូនទៅអតិថិជន ។ ការទទួលស្គាល់កំហុស និងការសុំទោស ធ្វើឲ្យអតិថិជនស្ងប់ចិត្តពីកំហឹងរបស់ពួកគេ ហើយធ្វើឲ្យទំនាក់ទំនងរវាងអតិថិជន និងក្រុមហ៊ុនកាន់តែប្រសើរឡើង។ ភាពស្មោះត្រង់របស់អតិថិជនតាមរយៈការផ្តល់ឲ្យពួកគេនូវ អារម្មណ៍ពេញចិត្តគឺជាការ ការពារចំណែកទីផ្សាររបស់ក្រុមហ៊ុន និងការពង្រឹកទំនាក់ទំនងឲ្យកាន់តែល្អប្រសើរឡើង។
តើគោលគំនិតទាំងនេះអនុវត្តចំពោះទីផ្សារកំពុងអភិវឌ្ឍរបស់កម្ពុជា ឬអត់? ទីផ្សារហាងកាហ្វេ ដែលមានលក្ខណៈប្រកួតប្រជែងគ្នា ប្រហែលជាឧទាហរណ៍ដ៏ល្អមួយ។ ក្រុមហ៊ុនដែលផ្តល់ឲ្យអ្នកនូវការស្វាគមន៍យ៉ាងកក់ក្តៅនៅពេល អ្នកទៅដល់ ស្គាល់ឈ្មោះអ្នក ស្គាល់ការកុម្ម៉ង់របស់អ្នក ផ្តល់ឲ្យអ្នកនូវស្នាមញញឹមយ៉ាងរាក់ទាក់ និងកក់ក្តៅ និងឥរិយាបថល្អ គឺជាការបង្កើតឲ្យអតិថិជនមានភាពស្មោះត្រង់៕
Friday, May 24, 2013
អតិថិជនជាអ្នកឲ្យអាជីវកម្មជោគជ័យ
May 24, 2013
